A empresa NH Obradoiro, filial da multinacional da explotación NH HOTELES, dálle unha nova volta de porca ás súas prácticas represivas, presionando a todo o persoal do centro de traballo á sinatura dun documento "refugando" os métodos de acción sindical da CUT na defensa das compañeiras e compañeiros da Sección Sindical represaliados e en concreto, do compañeiro e delegado Leonardo Da Cruz Blanco.

A CUT iniciará as medidas legais e sindicais axeitadas contra a distribución deste documento dentro do centro de traballo e as presións da Dirección para obrigar ao cadro de persoal á súa sinatura. A CUT quere tamén denunciar que detrás deste documento está a delegada de persoal de CCOO no centro, e dúas 1ªs Xefas de Departamento do Hotel (mandos intermedios), que están a atemorizar aos compañeiros e compañeiras do centro de traballo coa ameaza de peche do Hotel se a CUT continúa coas súas prácticas sindicais conscientes de defensa dos dereitos colectivos, tales como as concentracións e os puntos informativos no centro.

Doutra banda, a Secretaría Xeral da Central Unitaria de Traballadores e Traballadoras vén de solicitar unha xuntanza urxente coa Dirección o luns desta semana e para hoxe, venres, que foi trasladada onte e "por motivos de axenda" para o 6 de xuño pola dirección do Hotel. Se esta multinacional pensa que a nosa Central Sindical vai permitir máis un despedimento mentres dilatan as xuntanzas, está ben trabucada.

A primeiros da semana que vén a CUT fará público un calendario de mobilizacións. Para este luns, marcáronse xuntanzas bilaterais coas responsábeis de Hostalería de CCOO, UGT e a CIG, á agarda da adhesión a unha loita que é de fondo, e a obter un compromiso de unidade sindical contra as vulneracións gravísimas neste Hotel. Daremos conta dos resultados destas xuntanzas.

Contra a represión sindical, xuntas e xuntos podemos!

O pasado 10 de maio, nun exercicio de solidariedade co movemento estudantil que se leva activando decote contra os recortes no ámbito universitario, a CUT reforzou nas rúas o seu compromiso aberto, como central sindical galega e de clase, coa resistencia activa de todos os sectores sociais afectados polas políticas de destrución do común, e mais sobre todo, dos servizos públicos esencias e dos dereitos sociais, que están a ser dinamitados polas forzas activas do neoliberalismo, que coordenan en Europa hoxe e tamén no conxunto do mundo, unha agresión de dimensión global contra as clases traballadoras e as clases populares no seu conxunto.

Baixo lendas como "Contra o saqueo do ensino público", ou "Por un ensino 100% gratuíto, galego e de calidade. Lume ao privado!" as comarcas da Central Unitaria de Traballadores e Traballadoras e a recentemente constituída CUT-Mocidade, tomaron a rúa onda milleiros de estudantes e coa cidadanía inqueda coas políticas antipopulares do goberno español e da Xunta de Galicia, nunha xornada de loita que enceta agora unha dinámica de socialización da loita por este servizo público esencial, conquistado na historia a través da loita activa e consciente da clase traballadora.

A CUT valora o éxito desta xornada nacional, que non puido sequera verse esvaído pola constante miopía das centrais sindicais maioritarias que seguen a optar, incomprensibelmente, polo veto e o sectarismo sindical, monopolizando as mobilizacións e excluíndo toda a pluralidade de voces que constitúen unha xa ampla resposta social contra os recortes. Seguimos reclamando, máis unha vez, un exercicio de xenerosidade sindical encamiñado a coordenar os esforzos de todas as organizacións e toda a cidadanía comprometida activamente na defensa dos intereses da clase traballadora e das clases populares. Só a unidade xenerosa, humilde e a coordenación dos nosos esforzos, servirá de panca para tombar ao Capital.

A CUT chama a todas as organizacións sindicais do estudantado que estiveron nas rúas (Liga Estudantil, Comités, Agir, Sindicato de Estudantes, Revoluciona a USC), ás asembleas estudantís de base que se espallan polo País (como a de Pedagoxía en Compostela, ou a de Estudantes de Coia en Vigo entre moitas), e tamén a todas aquelas seccións sindicais de traballadoras e traballadores públicos e ás centrais sindicais que como a CIG compartiron esta xornada connosco, a xerarmos sinerxias para entre todas e todos, izarmos a bandeira social da defensa dun ensino público, universal, nacional, gratuíto e ao servizo das clases populares galegas. Un ensino de calidade para todas e todos nós.

Tan só tres semanas despois de que o goberno do Partido Popular anunciara unha tallada presupostaria de 10.000 millóns de euros destinada a desestruturar o sistema público de sanidade e de ensino, e logo de desenvolver diversas iniaciativas políticas de corte nacional-católico para asegurar o sometemento do corpo das mulleres traballadoras a través da expropiación dos seus dereitos reprodutivos e a supresión das axudas á dependencia, cun mercado de coidados sustentado case en exclusiva por mulleres de clase obreira, a dereita española vén demostrar a insuficiencia e a demagoxia do seu discurso da austeridade logo de facerse público o plan de inxección de 10.000 millóns de euros no rescate de Bankia, a entidade dirixida até hoxe por Rodrigo Rato, ex-vicepresidente do goberno de Aznar.

No seo dunha crise da entidade da actual, a clase propietaria está a demostrar a súa intención de que sexa o conxunto do pobo traballador quen se faga cargo dos restos dun festín no que empesariado e banca, agora en rexime self-service, agora co persoal de servizo das diferentes administracións, celebrabaron a presión constante da riqueza cara arriba, acumulada a cada vez en menos mans. E non só, senón que no duro contexto económico, social e político que está a vivir a clase traballadora e as clases populares no seu conxunto, ven a posibilidade de saquear as caixas públicas con rescates millonarios da banca e, tamén, das grandes empresas.

Ler máis...

A Central Unitaria de Traballadoras e Traballadores (CUT) apoia incondicionalmente as mobilizacións convocadas en toda Galiza para o próximo xoves 10 de Maio en loita por un ensino público, galego, de calidade e de balde.

Neste momento no que a dereita españolista e reaccionaria que goberna na Xunta e na Moncloa pretende arredar ás clases traballadoras do acceso ao ensino universal, é deber fundamental do sindicalismo nacional e de clase defender sen tregua todos os dereitos conquistados e loitar frontalmente contra as agresións privatizadoras, elitistas e neoliberais da dereita española.

De feito, a recentemente constituída CUT-Mocidade participará activamente nas mobilizacións convocadas polas organizacións do estudantado e da mocidade en resposta a todas as agresións que está a sufrir o estudantado da clase obreira.

Non podemos aceptar que continúen a empregar a crise, que eles mesmos provocaron, para nos privar dos nosos dereitos e ampliar mais aínda os seus privilexios. Nos podemos tragar con un ensino tan só accesíbel para os fillos e as fillas dos mais ricos. Non podemos permitir que nos rouben o que é noso.

A pública é servizo. A privada é beneficio.

O 10 de maio todas/os á rúa!

A Rede de Dereitos sociais e a platoforma en defensa da terra Galiza Non Se Vende veñen de tirar do prelo o Mapa Crítico de Galiza 2012, que sitúa sobre a diversidade xeográfica galega todos aqueles puntos de conflitividade social con centro nas agresións ecolóxicas que o noso País está a sofrir, e que son visibilizados polos colectivos sociais e en defensa da terra máis diversos.

Segundo os colectivos editores este Mapa "pretende ser unha sintética plasmación gráfica das agresións e conflitos que, relacionados co medio, son sinalados e problematizados politicamente por infinidade de colectivos sociais do pais que se opoñen cotiamente á destrución que o modo de explotación capitalista impón sobre o noso territorio" E que trata "baixo tres eixos necesariamente subxectivos (medio, sociedade, economía)" de recoller cartograficamente "algúns dos elementos centrais na loita pola defensa do que é de toda a cidadanía, do Procomún: ‘esa constelación de recursos que debe ser activamente protexida e xestionada na busca de manter o ben común".

O Mapa pode sere consultado na seguinte ligazón: http://rede.blogaliza.org/files/2012/05/120502_mapacritico.pdf. A loita en defensa da terra é para a Central Unitaria de Traballadores e Traballadoras unha loita en defensa da propia supervivencia da clase traballadora galega, e por iso saúda con entusiasmo esta iniciativa do tecido social nacional galego.