Este venres 24 de Febreiro a partir das 19:30 a CUT convoca xunto á CGT unha mobilización na cidade da Coruña en protesta ante a aprobación da Reforma laboral polo Goberno do PP.

A mobilización, que sairá da Praza de Portugal, virá avanzar no proceso de resposta que o sindicalismo combativo galego desenvolve fronte a unha agresión histórica aos dereitos da clase traballadora. A aprobación desta Reforma laboral deixa un escenario de relacións profundamente desequilibradas entre empresariado e persoas traballadoras, ante o cal as actitudes diplomáticas, prudentes ou apoucadas, son altamente irresponsables. Botar abaixo esta Reforma esixe de todos e todas unidade e firmeza nos principios. De non contestarmos con contundencia agora, poden retornar a pasos axigantados infames desigualdades sociais máis propias do século XIX.

Agardamos que a nosa manifestación deste venres sirva para incentivar a concienciación de todas as obreiras e obreiros, avanzando no camiño cara unha folga xeral exitosa que poña freo a actual ofensiva neoliberal.

Ler máis...

A doce horas do comezo da Folga convocada, hoxe ás 11,30 da mañá chegábase a un acordo entre o Comité de Folga e a Dirección das empresas FRIVIPESCA CHAPELA FRIGORIFICOS e FRIGODIS, S.A. (Grupo Pescanova).

Dito acordo para o ano 2011, establece un incremento en todos os conceptos do soldo do 2,5 %, sin a supeditación salarial ó incremento da “produtividade” que pretendía a patronal desde que se inciou a negociación.

Atrás queda a sinatura vergoñenta do “acordo extraestatutario” de CCOO, as chantaxes da Dirección para que un a un dos traballadores se adherirán a dito pacto, a cambio do cobro inmediato de atrasos e outras ameazas patronais.

A firmeza na resposta do conxunto dos traballadores de Frivipesca e Frigodis cos delegados da CUT á cabeza, ó desafío chantaxista do pacto de eficacia limitada, demostrou que a única medicina fronte ó medo e a barbarie segue a ser a organización e a loita sindical de clase.

Este conflito asi mesmo, senta pedagoxía para aqueles outros traballadores/as e sobre todo representantes sindicais, doutras empresas do Grupo Pescanova, que claudicaron e permitiron coa súa actitude a introdución nos seus respectivos Convenios Colectivos da supeditación do salario á produtividade, porta para a barbarie laboral.