Luns, 02 Febreiro 2009 20:31
O vindeiro xoves, día 5 de febreiro terá lugar Folga do Sector Naval en solidariedade cos catro traballadores que van ser xulgados ese día, no Xulgado do Penal nº 1 de Vigo. O xuízo fora aprazado o pasado 6 de novembro de 2008.
A Fiscalía solicita penas de catro anos de prisión para cada un dos acusados: Emilio Docampo, Iván Piñeiro, Xosé García e Daniel Cascallar, ademais da indemnización solidaria de máis de 8000 euros, imputándolles os delictos de danos e desordes públicos.
Ás 7 da mañá, os traballadores concentraranse nas portas dos estaleiros para máis tarde saír en manifestación polas rúas de Vigo ata o Xulgado.
Venres, 18 Xullo 2008 20:47
O día 23 de xuño a CUT dirixiuse por escrito ós sindicatos CIG, CCOO e UGT, reclamándolles a celebración dunha xuntanza, para abordar conxuntamente a problemática surxida a raíz do procesamento de catro traballadores do sector naval de Vigo, pola súa participación na Folga que tivo lugar o mes de maio do ano 2007.
No día de onte, pasado case un mes, por fin se celebrou a xuntanza coa participación dos máximos dirixentes do sector metal dos sindicatos chamados maioritarios. Vista a xuntanza celebrada, pensamos que foi unicamente polo compromiso e as preguntas que se están a facer moitos compañeiros nos estaleiros.
Como se ten informado, ós compañeiros: Daniel Cascallar, Ivan Piñeiro, Emilio Docampo e Xosé García, a policía e o fiscal impútalle a participación nos incidentes nas rúas de Vigo, na devandita Folga. Polos cales se lles ven a solicitar unha pena de catro anos de prisión a cada un deles e o depósito inmediato de máis de 8.000 euros como fianza solidaria.
